Kategoriaren artxiboa: Euskarazko kultur edukiak jasotzeko webguneak

Komunikazio lanak. MOXAL egitasmoaren Zaldikatu diskoa aurkeztu dugu

Atzo, martxoak 12 zituela aurkeztu genuen Hannot Mintegia Audience ohiaren MOXAL egitasmoaren ZALDIKATU diskoa Bilboko Kafe Antzokian.

Zer da Moxal?

«Moxal» zaldi gazteari esaten zaio. Sentikorra da bere inguruarekiko, igarotzen dituen lekuekiko eta inguratzen dituen izakieko. Batzuetan zalantzak eta ezinegonak izaten ditu, baina beti dago prest hazten den heinean entzuteko, eta bakarrik ibiltzen ikasteko.

Moxalak, nahiz eta basatia den, hurbiltzen uzten dizu, beroa eta biguna izatea ere maite duelako. Ingurunea eta bere burua eraikitzea maite du, gertutasunetik eta entzute basati batekin.

Moxalen kantak ametsen eta filmatu gabeko pelikulen soinu banden arteko tarteari kantatzen diote. Hizkuntza bera, hitzen soinua eta hizkera gertuko espazio bihurtuta; gertukoa eta xumea.

Moxal Hannot Mintegia musikari eta ekoizleak koordinatutako proiektua da. Audience eta gero, bere proposamen berria besteek bizi izateko espazioa da. Esaldi honekin iradoki edo esan nahi duena zera da, interprete edo “sortzaile total” baino gehiago, ekoizle edo konposatzaile bezala ikusten duela Hannotek bere burua. Hasierako ideia abestiak “beste batzuek” abestea zen neurri handi batean. Gerora ideia hori moldatu da baina hala eta guztiz “beste ahotsek” presentzia eta pisu handia dutela Zaldikatu diskoan. Baita ere orain Moxalek “forma” hau duela baina oso egitasmo zabala dela, oso zabalik dagoela Hannot formatu aldaketa eta mota guztietako kolaborazio eta elkartrukeei, izan daitekeela hurrengo proiektua 30 minutuko ikuskizun bat edo zuzeneko kontzeptu bat.

Maite Mursego-rekin, gutunak, ideiak eta soinuak banda zabaleko abiaduran ibili ziren joan-etorrian. Aiora Zea Mays-ek bi lerrotan ulertu eta emozio eta gizatasun makina batek bezala interpretatu zuen. Beti bezala agertu ziren Gaizka eta Ager Audience, eta ezinezko tokietan sartu zuten beraien musika. Miren Mice-k bere eztarria ireki zigun bihotzetik eta Rafa Rodrigok egiaz zarrastatu zuen bere gitarra. Ainara LeGardonekin ertzak iritsi ziren, eszitazioa. Zelako oihuak egin genituen ehunka zaldi haiek lautadan zehar hautsa harrotuz lauhazkan entzutean! Azkenik dena bere tokian zegoela sentitu genuen.

Orduan diskoa sortu zen eta Aitor Etxebarriak dotore itxi zuen atea.

Abestiek badute soinu banden pisua. Irudi batzuk edo “giro” batzuk iradokitzen dituzte. Ikus-entzunezkoena Hannotek bere egunerokoan maneiatzen duen tresna delarik, bere buruari erronka moduko hori jarri dio: bere esperientziaz baliatuz eta inguruan dituen sortzaile-lagunen parte-hartzea bultzatuz, abesti bakoitza ikus-entzunezko edo kontakizun txiki batekin batera aurkeztea. Era askotarikoak eta desberdinekoak izango dira “filmak”. Autore ikuspuntutik eginiko lan pertsonalak izango dira, sortzaile jakin batzuek izenpeturik.

Berbarako:

Gure Telenobelie: Miren Gaztañagaren sormen lanarekin.
Azalgorri: Unai Garate-ren (khea ziater) ideia eta zuzendaritzapean.

Seguru: Na Gomes-en sormen lanarekin.
Atzokokaka: Goiuri Aldekoa-Otaloraren (Argazkilaria eta dokumentalen ekoizlea) sorkuntza bat.
Disko hau Forbiddencolours zigiluaren 11. erreferentzia da. 2019ko martxoaren 1etik aurrera egongo da eskuragai, binilozko edizio mugatuan (+ deskarga kodea) eta bertsio digitalean.

Abesti bakoitza ikus-entzunezko pieza batekin aurkeztuko da bai www.mox.al eta bai forbiddencolours.net webguneetan.

Diskoa entzungai duzue: https://soundcloud.com/forbiddencolours/sets/0f1c0-moxal-zaldikatu/s-9aAV2

Abestiak:

01 GURE TELENOBELIE 3:41

02 AZALGORRI 4:32

03 LAGUNTZEKO NIRI 3:16

04 ATZOKOKAKA 4:51

05 SEGURU 4:10

06 ZALDIKATU#01 5:38

07 HAIXIE GARA? 4:48

08 BITXIDXENA 5:03

musika eta hitzak: Hannot

ekoizpena: Jose Lastra & Hannot

grabaketa: Tio Pete Studios (Urduliz), Larrartia baserria (Heleta), Mice-ren lokala eta Hannoten etxien

artea: madebynika.com

masterizazioa: Mateusz Majewski Concrete Cut Studios-etan (London)

MOXALAK:

Hannot: loop-ak, ahotsak, perkusioa, gitarrak eta Lastra’s noise box

Ainara LeGardon: ahotsak, bestelako soinuak (01, 02, 03, 04, 06)

Aitor Etxebarria: musika osagarria, pianoa eta noisy chair (08)

Aiora (Zea Mays): ahotsak (02, 04)

Miren Narbaiza (Mice): ahotsak (01, 04, 05, 07)

Gaizka (Audience): saxoa eta drunk pianos (04, 06)

Ager (Audience): pedal steel guitar (07)

Rafa Rodrigo: gitarra klasikoa (07)

Txufo Willson (Empty Files): grabaketa osagarriak eta aurrekoizpena

Maite (Mursego): ahotsak, hariak eta melodikoa (01, 02, 03, 05)

Zuzenekoak

Lehenengo zuzenekoa Gernikako Lekuek jaialdian izango da. Zuzenekoek izango duten forma oraindik zehaztu gabe dago. Diskoan geruza asko eta ikuspuntu anitzak uztartzen dira abestietan eta bide ezberdin askotara eraman ditzakete zuzenean interpretatzeko orduan. Printzipioz hirukotean ari dira lehenengo aurkezpen txiki horiek prestatzen: Hannot Mintegia, Jatsu Argarate (Kokein) baxuan, eta Txufo Willson (Empty Files) “beste soinuekin”, baina etorkizunean MOXALen beste musikari batzuek ere parte hartzeko aukera beti zabalik egongo da. Berbarako, Gernikako kontzertuan Gaizka (Audience) gehitzeko asmoa dute.

Ekainetik aurrera formatu handiagoko kontzertuak egin asmo ditu Hannotek. Horietarako Ainara Legardonek edo Miren Narbaizak ere parte hartzea nahi luke (bien agenden arabera). Baita Aitor Etxebarria (perkusioa eta teklatuak) edo Hasier Oleaga (bateria).

Adostuta dituzten emanaldiak:

-Martxoaren 16an, Gernikako Lekuek jaialdian.

-Ekainaren 14an, Donostiko Dabadaban.

-Ekainaren 20an, Bilboko Kafe Antzokian.

Arestian azaldu legez, Moxal os proiektu zabala izatea espero du Hannot Mintegiak, espazio ezberdinetara eraman ahal izateko modukoa. Printzipioz areto itxiak eta giro “lasaia” lirateke egokiena eta bakarka edo bostekotean aritzeko moduan moldatzea errepertorioa. Aretoak ahalbidetzen duenean, ikus-entzunezkoen presentzia handituko litzateke emanadian, abestiek baitute izan “inoiz filmatu gabeko pelikularen soinu banda” baten forma.

Hernaniko Ondarea jasotzen duen webgunea aurkeztu dugu

Hernaniko udalaren enkarguz, Hernaniko beste hainbat kultur eragilen ekarpen eta oneritziarekin, bertako ondarea, materiala/ez-materiala, higigarria/higiezina, jaso, bildu eta transmitituko duen webgunea aurkeztu dugu: www.ondarea.hernani.eus

– Urteetan hainbat herritarrek eta bestelako eragileek egindako lan
eskerga webgune bakarrera ekartzea estrategikoa da. Denak bilduta
ohartu gaitezke zernolako lan erraldoia den urteetako inurrien lan
hori. Denak bilduta webgune bakarrera ekarrita ohartu gaitezke ondarea
ondasuna dela, herri oso baten ondasuna.

– Ondarearen parterik garrantzitsuena bizia da, bizirik dago. Ondare
materiagabeari buruz ari gara, pertsonok sortzen dugun horri buruz,
kulturari lotutako horri buruz, izateari buruz lotutako horri:
ahotsak, dantzak, argazkiak, urtekariak…

– Transmisioaz: Jakintza, ezagutza, esperientzia guztion
transmisiorako bitarteko oso baliagarria da webgune hau, bai hezkuntza
arautu zein ez arauturako, bai etxe-giro edo familia bidezko
transmisiorako. Ikerketa espezifikoetarako ere, sekulako aurrerabidea da.

– Gaur egun, digitalizazioa sozializazio modu berriak eskaintzen ari
da eta sozializazio modu berri horien bitartez eskaintzen den kultur
kontsumoak gora egin du nabarmen. Euskal kultur ekosistema osatzen
dugunok inbertsio handi eta epe luzerakoak egin beharko genituzke
interneten, berau baita egun kulturgintzaren sozializazioan paradigma
aldaketa erabatekoa dakarrena. www.ondarea.hernani.eus ataria
beharrizan horri erantzuteko ekarpena da.

– Eduki estatikoa dinamiko bihurtu dugu: Erabiltzaileak, sartzen den aldiro, eduki
berri bat izango du jakinmin.

Webguneak elikatzeko formazio saioak: Bezero buruaskiak

Elgoibarko Izarra euskara elkartearen, Elgoibarko udalaren eta gure arteko elkarlanaren emaitza da www.euskaraalaezkara.eus ataria.

Bertan bildu dugu azken hamar urteotan Elgoibarren burutu diren jardunaldietako edukiak. Edukien bilketa eta sailkapen lan itzel hori Elgoibarko Izarra euskara elkartekoek eta udaleko euskara zerbitzuko teknikariek egin dute eta guk hori guztia ekarri dugu www.euskaraalaezkara.eus atarira.

Lan funtzional eta grafikoa, beraz, Dijitaliadeakoon ardura izan da.

Aurtengo jardunaldi ezin bikainagoak utzitako eduki guztiak Elgoibarko Izarrakoek eta udalekoek igoko dituzte, baita etorkizunekoak ere.

Guk tresna sortu diegu eta orain eurek elikatuko dute. Horixe baita gure lan egiteko ardatzetako bat. Guk ez ditugu bezeroak gatibatu nahi, buruaskiak gura ditugu.

Eta buruaskitasun hori gauzatzeko formazio saioa izan genuen atzo Elgoibarren, udaleko teknikariekin eta Izarra euskara elkartekoekin.

Atzo ikasitakoa jada erabili dute eta gaur eduki berriak igo dituzte www.euskaraalaezkara.eus atarira

Euskaraalaezkara.eus webgunea aurkeztu dugu

Atzo aurkeztu genuen www.euskaraalaezkara.eus webgunea. Bertan dituzue egitasmo honi buruzko argibideak

2018 10 08 Euskara ezkara webgunea1

argazkia: BARREN

Elgoibarko Izarra euskara elkartearen, Elgoibarko udalaren eta Dijitalidadea s.l gure enpresaren arteko elkarlanaren emaitza da webgunea.

Herri-ekimena, erakunde publikoa eta ekimen pribatuaren arteko sinergia.

Elgoibarko Izarrak eta Elgoibarko udalak 10 urtean antolatu dituzten jardunaldien edukiak bildu webgunean.

a 2018 10 08 Euskara ezkara webgunea2

argazkia: BARREN

Komunikabideek honela jaso dute aurkezpena:

BARREN aldizkaria

Noticias de Gipuzkoa egunkaria

Diario Vasco

Musikariak Nafarroako ikastetxeetan

Nafarroako Gobernuko Hezkuntza Departamentuak egindako lehiaketa publikoa irabazi genuen Dijitalidadea s.l enpresakook iragan berri den udan. Programaren helburua ikasleei euskal musikaren tradizioaren ibilbidea ulertzeko tresnak emanez, kultur sormenerako eta hizkuntzarekiko identifikazioa sustatzea da eta bide batez, zuzeneko musikaz gozatzeko aukera eskaintzea.

Musikariak ikastetxeetan programaren lehen ekinaldi honetan, honako musikariek hartuko dute parte: Amorante, Eñaut Elorrieta, Gorka Urbizu, Iker Lauroba, Ines Osinaga, Inun, Jon Basaguren, Joseba B. Lenoir, Joseba Irazoki, Jurgi Ekiza, Keu Agirretxea, La Basu, Maria Rivero, Mikel Markez, Miren Narbaiza, Olatz Salvador, Pantxix Bidart, Pelax, Petti, Rafa Rueda, Tristtan Mourguy, Xabi San Sebastian eta Zuriñe Hidalgo

musikariak ikastetxeetan programa nafarroa bilaketarekin bat datozen irudiak

Joan den irailaren 21ean aurkeztu genuen Iruñean Maria Solana kontseilaria lagun

musikariak ikastetxeetan programa nafarroa bilaketarekin bat datozen irudiak

Prentsaurrekoaren berri hemen:

Euskalerria Irratia

Naiz

Azpeitia 1936-1945 webgunea aurkeztu dugu

Aranzadirekin eta Azpeitiko udalarekin elkarlanean, 1936ko altxamendu faxistak azpeitian eragin zuen errepresioaren berri jasotzen duten liburuak webgune bihurtu ditugu. Atzo aurkeztu genuen Azpeitin bertan.

Erlo telebistakoek honela jaso zuten:

Urolakostako Hitzakoen albistea:

Aranzadi zientzia elkarteak egin eta Azpeitiko Udalak duela hilabete batzuk argitaratu zuen Azpeitia 1936-1945 liburua sarean da dagoeneko. Dijitalidadea enpresak egin du liburua sareratzeko lana, udalaren eskariz, eta gaurtik bisitatu daiteke:

Azpeitia 1936-1945

Gotzon Barandiaran Dijitalidadeako kideak azaldu duenez, liburua modu “oso errazean” sareratu dute. Batetik, liburuan ageri diren datuekin datu basea egin dute, eta, bestetik, liburua atalka irakur daiteke. Horrez gain, herritarren izen-abizenen gaineko jarraipena ere egin daiteke, datuak elkarrekin lotu dituztelako. Izen batetik abiatuta, ibilbide osoaren jarraipena egin daiteke Barandiaranen arabera: “Oso modu errazean aurkitu daiteke informazioa. Internet oso gutxi erabili dutenentzat ere, informazioa bilatzeko oso modu errazean antolatu dugu”.

Tropa faxistek Azpeitia hartu zutela 81 urte bete ziren atzo, eta Eneko Etxeberria Azpeitiko alkateak “gertaera horrek herria markatu” zuela gogorarazi du. Haren arabera, faxismoak gogor jo zuen herria: “Hilketa, tortura, debekuak… eta beldurra zabaldu zituzten gerran Azpeitian. Gerraosteko frankismoaren azken ostikadak arte markatu gaituzte. Frankismoaren azken biktima ofizialen artean dagoelako fusilatuta hil zuten Angel Otaegi. Baina egindako sarraskiez gain, gertatutakoa isilarazteko eta ezabatzeko egindako esfortzuak bere helburua lortu zuen”. Etxeberriak azaldu du gaur egun ere “faxismoa bizirik” dagoela, Herrialde Katalanetan gertatzen ari dena gogora ekarrita.

Alkatearen aburuz, isiltasuna “nagusitu” bada ere, Azpeitiko Udalaren konpromisoa memoria berreskuratzea izan da azken urteotan. “Bi aukera genituen, omenaldi ponpoxoetan gelditu edo ikerketa egin. Eta Aranzadi zientzia elkartearekin elkarlanean ikertzeari ekin genion”. Informazioa jasotzeko eta hori zabaltzeko eta berriro horrelakorik gerta ez dadin herritarrak “hezteko eta informatzeko” lanean ari da udala, Etxeberriak dioenez: “Gertatutako guztiaren oroimenerako terapiarik onena liburu hauek dira”.

Azpeitibizi: Zatoz onera, zatoz Azpeitira

Maite ditut maite gure bazterrak, baina bizi dituzten pertsonei eskerrak

Azpeitibizi egitasmoaren bitartez Euskal Herriko zein kanpoko bisitariak erakarri nahi ditugu Azpeitira

Egitasmoak bi euskarri ditu ardatz:

Webgunea
Mugikorretarako aplikazioa

Bi hedabide hauen bitartez, Jendeak jendea erakartzea dugu helburu.

Arrazoi nahikoa eta sobera ditugu horretaz ziur egoteko:

Azpeitiarrak dira Azpeitik eskaini dezakeen onena.

Azpeitiarrek euskara dute balio erantsi nagusiena.

Euskaraz bizi den herria baita Azpeitia, gainontzeko euskal herrietatik hurreratzen denak berehala antzemango duen eran.

Euskarak kultura bat dakar aldean, azpeitiarrek jaso, gorde, mantendu, bersortu, eguneratu, moldatu, eurenganatu, zabaldu eta transmitituz bizirik mantentzen dutena, Kultur Mahaiak auzolanean biziberritzen duena.

Bizia baita Azpeitia, azpeitiarren euren esanetan, bizi-bizia, bizitzeko pizgarria.

Bizitzeko herri bizia da Azpeitia, bisitaria beso zabalik hartzen duena, herrira iritsi eta azpeitiartu direnek baieztatzen duten eran.

Ospatzen badakien herria da Azpeitia, hasi urtarrilean eta abendura bitarte, eguneroko izerdia bizipozerako edabeekin neurrian nahasten dakiena.

Langileen herria da Azpeitia, 1766an matxinatu zen huraxe.

Gertakari historikoek zizelkatu duten herria da Azpeitia, memoriaren historia eraikitzen jakin izan duena.

Mendeetan bizi izan duten, gaur bizi duten eta etzi biziko duten azpeitiarrek bihurtu dute Azpeitia edozein bisitarirentzat erakargarri.

Euskaraz bizi, kulturalki bizi, herritar bizi, Azpeitibizi.

Bisitariak altxor horien aitzakiapean erakartzeari Turismoa baderitzogu, turistikoki herri bizia dugu Azpeitia, turismo aktiboa baino, turismo bizia eskaintzen duena.

www.azpeitibizi.eus webgunean honakoak bildu ditugu:

Zatoz onera, zatoz Azpeitira bideo sorta, hainbat azpeitiarren bizipenak jasotzen dituena.

Azpeitiren ondarea jasotzen duten postal literarioak.

Azpeitin eta bere inguruetan egin daitezkeen adin guztietako bisitarientzako era askotako ibilbideak.

Lo, jan zein edateko ostatuak.

Oinarrizko zerbitzuak.

Azpeitibizi mugikorretarako aplikazioan, arestian aipatutako edukiez gain, Agenda ere izango dute eskura bai azpeitiarrek eta erabiltzen duten gainontzekoek ere. Ekitaldi kulturalez zein bestelako ekimen sozialez beteriko edukia zabalduko dugu bertatik.

Euskal Herriko herri guztiek dute bere balio erantsia, ezkutuan, gehienetan.

Azpeitikoa ikusgarri bihurtu dugu eta edozeinen eskura jarriko dugu.

Azpeitibizi egitasmoa aurkeztu dugu: Euskal Herria ezagutzeko herritarrak, euskara eta kultura amu

Joan den maiatzaren 11an aurkeztu genuen Azpeitiko udalarekin batera lantzen ari garen Azpeitibizi egitasmoa. Egitasmoaren lehen fasean, webgune bat eta mugikorretarako aplikazioak sortu ditugu.